Skip Content
Kahoolawe aerial

Whakaarotia ngā moutere o Hawai’i – he aha tāu e pohewa nei? 

Kāore e kore, e kitea ana e koe te kirikiri kōuraura, mā kē rānei, ētehi tāngata e hekengaru ana, me ngā rākau niu e pīoioi ana i ngā hau koangi o te moana pūataata. 

Whakakoretia atu tērā whakaahua! Ehara te moutere o Kaho’olawe i te pērā, he koraha, he puehu, he takutai tokatoka, he wai ehuehu, ka mutu, kāore he hōtera, kāore he toa, kāore he hiko, ā, kāore hoki he tāngata. 

Engari, ahakoa kāore ērā āhuatanga i reira, e kore au e kī, kāore ōna rawa; ko tētehi mea nui kē atu kei reira, ko te wairuatanga, ā, koinei kē te take o te haerenga o mātou, o Te Matapunenga[1] ki taua whenua. 

Nō nehe, nō tuawhakarere, i huihui ai ngā iwi taketake ki Kaho’olawe ki te tuku karakia ki ō rātou atua māori, ā, whakahaeretia ana aua tikanga ki ngā wāhi tapu kei reira ngā tuāhu e tū tonu ana, nō te huringa o te wā ka kore haere ērā āhuatanga, ā, nāwai nāwai, ka riro ngā moutere katoa o Hawai’i i te kāwanatanga o Amerika, ka taka anō te wā, ka whakamahia te moutere tapu o Kaho’olawe i ngā tau o te whā tekau hei whenua whakamātau pahū mā te tauā moana o Amerika tonu. 

Pōkokohua hoki! 

Māringanui i ara ake he iwi mātātoa i ōna tau whā tekau ka huri, i pakanga, i whawhai kia hoki te whakahaeretia o te moutere raka ki ngā kānaka Māoli, nā te pērā i te tau 1990, i mutu ai ngā mahi whakapahū, ā, ka riro anō te moutere i ngā Maoli. Ko tētehi take i whakahokia ai te moutere, ko tā te Maoli kī i tā rātou kēhi, he wāhi me taea e rātou ā rātou tikanga tapu, arā ā rātou kawa ki ngā atua te whakahaere, ā, ko Lono tētehi o aua atua e āta whakamānawatia ana i ngā marama o Makahiki; ko te wā tērā e whakanuia ana te Tau Hou Maoli. Mai i taua wā, tau atu, tau mai, ka aro tētehi rōpū whāiti ki te hāpai i aua tikanga rā mō Makahiki. 


Nō reira, tō mātou māri i whāi wāhi ai mātou ki reira ki te mātakitaki i ā rātou tikanga, i ā rātou whakahaere ki te atua nei ki a Lono, arā e ai ki a tātou ko Rongo. 

Heoi anō, e tae atu ai ki reira me kaukau rawa! 

Kaua hoki ko tō kotahi me tana kore noa iho, engari kē ia, me kaukau me ō utauta, arā ngā mea mō te roanga o te noho e ono ngā pō, a te whā tekau tāngata ki reira: kākahu, tēneti, pēkemoe, kai, wai māori (nā ngā mahi pahū kāore he wai māori o te moutere), ngā tāwhara kai atua (mō ngā kawa ki ngā tuāhu), aha atu, aha atu, katoa me kaukau e te iwi i te poti ki reira. 

Nā konā me ngākau tapatahi ki te kaupapa, kāore ō take mehemea kāore koe e pono ki te kaupapa.

Engari, kei pātaia mai hoki mātou e koutou ‘e aha ana koutou, e Māori mā e, ki koraka?’, hāunga te mātakitaki, ko tā mātou he wānanga i tā mātou i kite ai, i rongo ai, i wheako ai nō mātou i ō tātou matamata huānga o Hawai’i me ā rātou whakahaere me kore noa e hihiri ō mātou ngākau ki te whakaora i ētehi o ā te Māori o tāukiuki whakahaere e pā ana ki a Matariki. 

Kia mōhio mai koutou, ko tētehi o ngā whakahaere a te iwi, ko te umu tapu, ā, e kitea ana he ōritengatanga kei taua mahi ki ētehi o ā tātou tikanga ki a Matariki, ka waiho noa e au tērā kōrero hei tīwhiri ki a koutou mō ngā whakaritenga kei te haere ake ā raurangi rā. 

Tē taea e au ngā mea katoa i mahi ai mātou te whakawhāiti ki konei, me pukapuka rawa e ea ai tērā, heoi anō, me kī pēnei, taihoa e te ao Māori, ka kitea ngā hua o tēnei haerenga whakahirahira rawa atu. 

Ka nui tēnā, hoi, me mihi e au te iwi nā rātou mātou i pōwhiri, i tauwhiro, i manaaki, kāore e ārikarika ā mātou whakamānawa nui ki a koutou, e te whānau, he wā tōna ko mātou ka hoki, ko koutou hoki ka tae mai ka puta ana te karanga ki a kouotu. 

Aloha i a ‘oukou! Ā hui hou! Aloha ‘āina!



[1] He rōpū karakia Māori taketake Te Matapunenga, i whakaritea e Ahorangi Pou Tēmara rāua ko Tākuta Wharehuia Milroy i ngā rima tau ka mahue ake nei. Ko ngā taura, he ika-ā-Whiro nō ngā rangapū tuatahi ki te tuaono o Te Panekiretanga o Te Reo. 

 Back to news & events

Published On:

Article By: Paraone Glyone



Other Articles

  • 08 October 2025

    From paddling to politics: a journey for reo, rights and representation

    Bevan O’Connor’s journey from waka ama to the political stage is powered by his passion for te reo Māori and Māori rights. Discover how his studies at Te Wānanga o Aotearoa and deep connection to te ao Māori are shaping his campaign for the Takitimu Māori Ward.

  • 23 September 2025

    HRC Maternal Health Inequity Report

    New research led by Dr Sarah Lockwood highlights critical gaps in maternity care during Cyclone Gabrielle, urging the Government to include midwifery and Māori leadership in emergency planning. The report calls for equity-focused reforms to protect pregnant women and whānau in climate crises.

  • 18 September 2025

    From Wānanga baby to Wānanga tauira

    Ripekka Matthews’ lifelong connection to Te Wānanga o Aotearoa began as a child and continues today through her te reo Māori studies. Discover how her journey from wānanga baby to tauira reflects whānau legacy, cultural identity, and the transformative power of education.

  • 05 September 2025

    Cooking up confidence in te reo Māori

    Āku Hapa! is a reo Māori cooking show created by Te Wānanga o Aotearoa tauira, blending kai, kōrero, and comedy. Streaming on Māori+, this series celebrates learning te reo through laughter, mistakes, and whānau connection - one delicious dish at a time.