Te Reo Kairangi

E rua tau te roa o te tohu paerua nei, ā, 10 ngā wānanga i te tau ka whakaakona e Tā Tīmoti Kāretu rātou ko Pānia Papa, ko Leon Blake. Kāore he tuhinga whakapae i tēnei momo tohu paerua. Mātāmua ana ko te whakapakari i te reo o te tauira e puta ai ia hei toa whakarauora reo mō tōna hapori.

E uru ai te tangata ki te hōtaka nei:

• kua pakeke ake ia i te 18 tau; ā,

• kua mana ā-ture te kīia ōna he kirirarau nō Aotearoa (nō Ahitereiria rānei, nō Tokelau rānei, nō Niue rānei, nō Ngā Kuki Airani rānei) he tangata rānei e noho pūmau ana ki Aotearoa; ā,

• kua puta tōna ihu i tētahi whakamātautau ā-waharoa; ā,

• kua eke te kounga o tana reo Māori ki tētahi taumata teitei tonu; ā,

• kua eke te kounga o tana reo Pākehā ā-waha, ā-tuhi anō hoki ki te taumata e tika ana e taea ai e ia ngā āhuatanga o te whakawhiti reo; ā,

• kua tutuki hoki i a ia tētahi o ēnei o raro iho nei:

  • he tohu paetahi, ko te reo Māori tōna kaupapa matua;

  • he tohu paetahi kē atu me Te Pīnakitanga ki Te Reo Kairangi;

  • kua puta ia hei ika a Whiro i Te Panekiretanga o Te Reo;

  • kua 10 tau, kua neke atu rānei i tērā, te roa o tana ako rānei, o tana noho rānei, o tana mahi rānei i tētahi taiao ko te reo Māori tōna kaupapa matua.

Mēnā he ika a Whiro koe nō Te Panekiretanga o Te Reo, e āhei ana tō tono kia whakawhiwhia koe ki tētahi hautoru o ngā whiwhinga kei roto i tēnei tohu paerua, ki tētahi wāhanga e nui ake ana rānei i tērā. Mā ngā kaiako e whakatau te nui o ngā whiwhinga ka whakawhiwhia atu.

I te taha o tētahi o ngā tohu me ngā āhuatanga o runga nei me puta te ihu o te tangata i te whakamātautau waharoa e āhei ai tana uru mai ki te tohu. He wāhanga kei roto i tēnei whakamātautau hei tohu i te kounga o te reo Māori me te reo Pākehā – ā-tuhi, ā-waha hoki, tae rā atu hoki ki tētahi wāhanga e whakaatuhia ai e te kaitono ōna pūkenga mātauranga e tika ai tana noho hei tauira ki tēnei hōtaka.

Me mātua uru ki tēnei tohu hei tauira ukiuki. E 240 ngā whiwhinga me riro i roto i te rua tau. Ka whakaakona ngā kaupapa i roto i ngā wānanga tekau (10) i ia tau ka tū i ngā mutunga wiki me ētahi rā o te wiki i ia marama, atu i a Hune ki a Mei mō ngā tau e rua. Me mātua tae mai koe ki ngā wānanga e 9 o ngā wānanga 10 i ia tau, e puta ai tō ihu, ka mutu, kotahi anake o aua mea e iwa rā e whakaaetia ana kia hono te tauira mā te ipurangi, mehemea ka tūpono ara tētahi take whawhati tata. E rua ngā wānanga kua whakaroahia kia 5 rā te roa. Ko te rite o ērā wānanga roa, ko te tōpū o ngā wānanga mutunga wiki e rua. (Wenerei ki a Paraire = 1; Pō Paraire ki a Hanarei = 1)

I ngā wiki e rere ana te hōtaka, me whakaoti koe i ētahi mahi hei hāpai i ngā akoranga i ngā wānanga. Tōna 21 hāora ka pau i a koe ki te whakaoti i aua mahi rā. Ko ētahi o ngā mahi rā me oti i te whārangi ipurangi ka whakaritea. Me whai pūrere hiko koe e hono ana ki te ipurangi e tutuki ai ētahi o ngā mahi ka tukuna e ngā kaiako hei whakaoti māu.

Te utu akoako i te tau 2026

• Te utu akoako o te tau 1: $6,897

• Te utu akoako o te tau 2: $6,897

GST inclusive